Aprè li te fin inyore envitasyon jij enstriktè Louima Louidort vandredi 19 janvye 2024 a, majistra menm jou a te tou profite lage yon manda darè kont ansyen prezidan Sena Repiblik Dayiti a, senatè Yourry Latortue.
GONAYIV, 22 JANVYE 2024
Ansyen palmantè a akize de konplisite nan asasina, konplisite nan boule Tribinal Premye Enstans Gonayiv la ki se vil natal li, asosyasyon kriminèl, fo ak itilizasyon fo.
Ta sanble Jij Envestigasyon Louima te vle tande fondatè pati a (AAA) nan kad dosye ki te enplike Aboulò ak Addy, 2 manm pati AAA a ke la polis te arete nan mwa me 2023, epi sezi yon zam nan men Aboulò ki ta dwe pwopriyete konpayi sekirite ansyen palmantè a.
Toujou nan kad dosye sa a, la nistis te mete yon manda arestasyon kont responsab operasyon konpayi « Sekirite Nasyonal la », Mesye Patrick Vladimir Bourdeau pou konplisite, falsifikasyon, fo ak à itilizasyon fo epi asosyasyon malfektè.
Nap raple ke Paulette Latortue, kise ti sè ansyen Prezidan Sena a, Youri Latortue, te arete pou relasyon li te genyen ak chèf gang « Meyer », lendi 8 me 2023 nan vil Gonayiv. Epi chèf gang Junior Barthélémy ke yo rekonèt sou non Aboulò ak Addy te idantifye kòm pwòch ansyen Senatè an, te arete kèk jou aprè.
ERNSO DESRAVINES